Улично осветлување
Оваа година, треба да се одржат локални избори, па градоначалникот на главниот град сака да поправи неколку светилки на главниот булевар во градот. Булеварот има N светилки, сите тие се наоѓаат во една линија, и (во овој момент) некои од нив се исправни, додека други се расипани. Да кажеме дека светилките се означени со броевите, 1, 2, 3,… , N – по редослед.
Во буџетот на градот има доволно средства за поправање на точно K светилки. Градоначалникот сака изборот на K-те светилки кои ќе се поправат да се направи така што, по поправањето, ќе се максимизира бројот на последователни светилки на булеварот кои ќе бидат функционални (т.е. ќе се направи да светат што е можно поголем број на последователни светилки). На тој начин, градоначалникот ќе може да сними долго видео од уличното осветлување на булеварот на кое ќе се гледаат само светилки кои работат.
На пример, на сликата дадена погоре има N=6 светилки. Доколку се поправи светилката со реден број 3, тогаш на булеварот ќе има дури 5 последователни светилки кои работат (од втората до шестата).
Напишете програма која ќе го пресмета најголемиот број на последователни светилки кои може да светат на булеварот, доколку градот има буџет за поправање на K неисправни светилки. Потоа, отпечатете точно кои светилки треба да се поправат, за да се постигне целта.
Влез
Во првиот ред се наоѓаат два цели броја N и K (1 <= K <= N <= 200000).
Во вториот ред се наоѓаат N цели броеви (1 или 0), кои ја означуваат иницијалната состојба на светилките - т.е. кои светилки се исправни (1), а кои неисправни (0). Првиот број ја означува светилката со реден број 1, итн. Бројот K секогаш ќе биде помал или еднаков на бројот на неисправни светилки.
Излез
Во првиот ред отпечатете го бараниот максимален број на последователни светилки кои може да работат.
Во вториот ред отпечатете K цели броеви, кои ги означуваат редните броеви на неисправните светилки кои треба да се поправат, по растечки редослед.
Доколку постојат повеќе можни решенија кои доведуваат до бараниот резултат, можете да отпечатите кое било од нив.
Ограничувања
Временско ограничување: 200 milliseconds
Мемориско ограничување: 64 megabytes
Примери
влез 6 1 0 1 0 1 1 1 | излез 5 3 |
влез 5 5 0 0 0 0 0 | излез 5 1 2 3 4 5 |
влез 6 3 1 0 0 0 0 1 | излез 4 2 3 4 |
Објаснување за првиот пример: Ова е примерот кој е даден на сликата, и кој е објаснет во текстот на задачата.