Во Македонија се спроведува процес на гасификација, со кој сите N градови во нашата држава ќе бидат поврзани со гасоводна мрежа. За државата да нема преголеми трошоци за реализација и одржување на овој проект, одлучено е да се изградат точно N-1 двонасочни цевки, секоја помеѓу два града, и (N-1)-те цевки да се направат така што секој град ќе биде поврзан во гасоводната мрежа. Со други зборови, гледајќи ги поврзувањата, треба да е можно низ цевките да се пренесе гас од кој било град до кој било друг град.

Секој градоначалник во консултација со градскиот архитект утврдил точно колку цевки може да се спојуваат (да почнуваат/завршуваат) во тој град. Па така, за секој од N-те градови ни е познат бројот Ci, кој означува дека i-тиот град треба да има двонасочни цевки до точно Ci други градови.

Нека градовите се означени со редните броеви од 1 до N. Напишете програма која ќе помогне да се дизајнира мрежа од N-1 двонасочни цевки, така што ќе биде исполнето барањето на секој град.

Влез

Во првиот ред е запишан еден цел број N (2 <= N <= 100000), кој го означува бројот на градови. Во вториот ред се запишани N цели броеви Ci (1 <= Ci < N).

Забелешка: Во тест случаи кои носат најмалку 15% од поените, бројот N ќе биде помал или еднаков на 3.
Во други тест случаи кои носат најмалку 25% од поените, бројот N ќе биде помал или еднаков на 8.
За дополнителни 30% од поените, бројот N ќе биде помал или еднаков на 1000.

Излез

Доколку е можно да се создаде гасоводна мрежа која ги исполнува барањата на сите градови, отпечатете N-1 парови од броеви, каде секој од паровите означува два града кои треба да се поврзат со двонасочна цевка за пренос на гас. Сите градови мора да се поврзани, т.е. следејќи ги двонасочните цевки треба да е можно да се пренесе гас од кој било град, до кој било друг град. Доколку постојат повеќе можни решенија, можете да отпечатите кое било од нив.

Доколку не е можно да се направи гасоводна мрежа која ги исполнува барањата, отпечатете PROBLEM.

Ограничувања

Временско ограничување: 500 milliseconds
Мемориско ограничување: 64 megabytes

Примери

влез
4
2 1 2 1

излез
1 2
1 3
4 3

влез
6
2 2 2 2 2 2

излез
PROBLEM

Објаснување за првиот пример: Доколку има двонасочна цевка помеѓу првиот и вториот град, помеѓу првиот и третиот град, и помеѓу третиот и четвртиот град, тогаш е исполнето барањето на сите градови во однос на бројот на цевки (2 за првиот, 1 за вториот, 2 за третиот и 1 за четвртиот), и секој град е поврзан во гасоводната мрежа.

Објаснување за вториот пример: Не постои поврзување со точно N-1 двонасочни цевки кое ги исполнува барањата на секој град.