Кога развиваме програми или софтверски решенија со помош на програмскиот јазик C++, често користиме Интегрирани Развојни Околини (IDE) за побрзо и поефикасно користење на нашето време. Имено, денешните Интегрирани Развојни Околини поддржуваат голем број на функционалности, вклучувајќи автоматско комплетирање на нашиот код, означување на грешки како што пишуваме, откривање на проблеми (дебагирање) и слично.

Во продолжение, ќе разгледаме неколку вакви софтверски решенија кои работат на оперативниот систем Microsoft Windows, вклучувајќи преглед на нивните функционалности, како тие изгледаат и слично. Повеќето од Интегрираните Развојни Околини кои ќе ги споменеме подолу имаат бесплатна верзија која можете брзо и едноставно да ја инсталирате на вашиот компјутер. Се разбира, доволно е да користите една од овие околини (онаа која вам најмногу ви се допаѓа), и нема потреба од подесување и инсталација на сите нив. Зависно од проектите на кои работат нивните тимови, некои софтверски инженери користат една околина, а некои друга.

Visual Studio IDE#

Visual Studio е веројатно најдобрата Интегрирана Развојна Околина која функционира на оперативниот систем Microsoft Windows. Истата нуди голем број на можности вклучувајќи комплетирање на кодот, едноставно менување на имиња на променливи и функции на повеќе места истовремено, моќни можности за откривање на грешки и проблеми со меморија, тестирање, соработка помеѓу повеќе корисници и слично.

Инаку, Visual Studio може да се инсталира и користи како на Windows, така и на macOS. Самиот софтвер може да се користи за развој на Android, iOS, Windows, cloud и web апликации.

За Visual Studio постојат и голем број на екстензии, за работа со различни елементи од еден софтвер – бази на податоци, модели за игри и слично. Во однос на самите функционалности, постојат повеќе верзии на Интегрираната Развојна Околина, вклучувајќи: Visual Studio Community (бесплатна верзија), Visual Studio Professional (за мали тимови) и Visual Studio Enterprise (за поголеми тимови и компании, со голем број на екстра можности и функционалности). Софтверот можете да го преземете од официјалната веб страница за Visual Studio.

Visual Studio Code#

Visual Studio Code е бесплатен софтвер со отворен изворен код, кој може да се користи за развој на разни апликации и пишување на код во повеќе програмски јазици. Покрај обележување на кодот со разни бои во зависност од типот на клучните зборови и променливи, оваа Интегрирана Развојна Околина (IDE) нуди и автоматско комплетирање на кодот во зависност од типот на променлива и/или функција, вклучени модули и фајлови и слично.

Софтверот нуди и моќни можности за откривање на грешки и дебагирање, како и поддршка за Git – т.е. зачувување на разни верзии од кодот како на вашиот компјутер, така и на разни системи за чување на истиот.

Постојат голем број на екстензии за Visual Studio Code, со поддршка за разни активности, сервиси, програмски јазици и слично. Притоа, истите функционираат како посебни процеси, што значи дека самите екстензии нема да придонесат за намалување на перформансите на Интегрираната Развојна Околина.

Visual Studio Code има поддршка за C++, C#, PHP, Java, JavaScript, TypeScript, CSS, XML, Python, Go, и многу други јазици и типови на датотеки.

Оваа Интегрирана Развојна Околина може да се преземе и инсталира на повеќе оперативни системи, вклучувајќи ги тука Microsoft Windows, Linux и macOS. На официјалната веб страница за софтверот можете да пронајдете и други Често Поставувани Прашања, новости, како и датотеки за инсталација на софтверот.

Code::Blocks#

Code::Blocks е бесплатна Интегрирана Развојна Околина, која е особено позната по фактот што истата се користи од страна на неколку Олимпијади по Информатика, вклучувајќи ја и Интернационалната Олимпијада по Информатика. На истата, натпреварувачите решаваат разни алгоритамски задачи (преку пишување на изворен код за програми кои ги решаваат задачите) во ограничен временски период.

Code::Blocks може да се користи на повеќе оперативни системи, а самиот софтвер е со отворен изворен код. Покрај помош при пишувањето на кодот, форматирање, автоматско комплетирање и обојување, Code::Blocks поддржува и моќен систем за откривање и отстранување на грешки (debugging), како и повеќе екстензии. Оваа Интегрирана Развојна Околина поддржува повеќе C++ компајлери, вклучувајќи ги тука: GCC, MSVC++, clang, Borland C++ и други.

Code::Blocks може да се преземе и инсталира од официјалната веб страница на проектот, каде што можете да пронајдете и повеќе информации за неговите функционалности, екстензии, лиценцата за користење на софтверот и друго. Слично, доколку сакате да им помогнете на развивачите на оваа Интегрирана Развојна Околина, можете и да донирате ваши средства.

CLion#

CLion претставува околина за пишување на разни програми и софтверски решенија користејќи ги програмските јазици C и C++. Самата Интегрирана Развојна Околина може да се користи на повеќе оперативни системи (вклучувајќи го и Microsoft Windows), има моќен едитор за код со автоматско комплетирање, форматирање, навигација и создавање на код, како и брза и ефикасна анализа на целиот напишан код во проектот на кој тековно работите.

Моќниот систем за откривање и отстранување на грешки дозволува преглед на вредноста на променливите, пресметка на изрази и поврзување со локални процеси или дебагирање од далечина. Од страна на CLion се поддржани и најновите верзии на програмскиот јазик C++ (на пример, C++17), како и Git, Subversion, CVS и други системи за чување на изворниот код.

CLion е дел од мрежата на Интегрирани Развојни Околини понудени од страна на JetBrains, па самиот софтвер можете да го преземете од нивната официјална веб страница. Неколку светски познати компании, како Google, BMW и Pinterest го користат CLion за работа со нивните проекти кои се базираат на програмскиот јазик C++.

Завршни коментари#

Се надевам дека споменавме барем една околина која ви се допадна, и која ќе ја испробате. Сепак, важно е тука да споменеме и дека постојат и голем број на други Интегрирани Развојни Околини и софтверски решенија кои може да се користат при развој на софтвер, а кои не ги споменавме погоре. На пример, Eclipse има поддршка за програмскиот јазик C++, преку својот C/C++ Development Tooling проект (CDT). Доколку сакате да истражите и други можности и софтверски решенија, ви препорачувам да продолжите со тоа на пребарувачите Google и/или Bing.